ශ්රී ලංකාව, ආර්ථික සහ විදේශ විනිමය අර්බුදයෙන් සෙමෙන් යථා තත්ත්වයට පත් වෙමින් සිටින මෙම අවස්ථාවේ රුසියාවෙන් විශාල සහායක් බලාපොරොත්තු වන බවත් ණය ලබා ගැනීම සම්බන්ධයෙන් පවත්වන සාකච්ඡා වල සුභදායී ප්‍රගතියක් තිබෙන බවත් ගුණවර්ධන මහතා එහිදී පෙන්වා දී තිබේ.
රුසියාවෙන් තෙල් මිලදී ගැනීමට සහ රටේ පවතින ඉන්ධන අර්බුදයට සහනයක් ලබා ගැනීමට ශ්රී ලංකාවට ණයක් ලබා දෙන ලෙස ශ්රී ලංකා හිටපු ජනාධිපති ගෝඨාභය රාජපක්ෂ මහතා රුසියානු ජනාධිපති ව්ලැදිමීර් පුටින්ගෙන් ඉල්ලා සිටි බව ගුණවර්ධන මහතා එහිදී ප්‍රකාශ කර ඇත.
එරෝෆ්ලොට් ගුවන් ගමන් අත්හිටුවීමට හේතු වූ එම ගුවන් සේවයට අයත් ගුවන් යානයක් ශ්රී ලංකාවේ රඳවා තබා ගැනීමේ සිද්ධිය පිළිබඳ තමන් සමාව අයැද සිටින බව ශ්රී ලංකා ප්‍රවාහන අමාත්‍ය බන්දුල ගුණවර්ධන මහතා රියා නොවස්ති පුවත් සේවය සමඟ පැවති සම්මුඛ සාකච්ඡාකදී ප්‍රකාශ කර ඇතැයි රුසියන් ටුඩේ පුවත් සේවය වාර් තා කළේය.
උසාවි නියෝගයක් මත එරෝෆ්ලොට් ගුවන් සේවයට අයත් ගුවන් යානාවක් ශ්රී ලංකාවේ රඳවා ගැනීම අවාසනාවන්ත සිදුවීමක් බවත් එය බරපතල අත්වැරැද්දක් බවත් ඒ සම්බන්ධයෙන් ශ්රී ලංකා බලධාරීන් සමාව අයැද සිටින බවත් බන්දුල ගුණවර්ධන මහතා එම සම්මුඛ සාකච්ඡාවේදී ප්‍රකාශ කර ඇත.නැවත මෙවැනි දෙයක් සිදු නොවන බවට ජනාධිපති රනිල් වික්‍රමසිංහ මහතා,අග්‍රාමාත්‍ය දිනේෂ් ගුණවර් ධන මහතා සහ ශ්රී ලංකා රජය සහතික වන බවත් කිසිම ගුවන් යානයක් ශ්රී ලංකාවේදී අත් අඩංගුවට ගැනීමට අවශ්‍යතාවයක් නැති බවත් ගුණවර් ධන මහතා එහිදී පැහැදිලි කර තිබේ.
ශ්රී ලංකාව සහ රුසියාව අතර ගුවන් ගමන් ඔක්තෝම්බර් මස මැද වන විට ආරම්භ වනු ඇතැයි බලාපොරොත්තුවක් තිබෙන බව ගුණවර් ධන මහතා එහිදී පෙන්වා දී ඇත.
එම්.අයි.ආර් ලෙස හැඳින්වෙන රුසියානු ගෙවීම් පද්ධතිය සමඟ සම්බන්ධ වීමේ හැකියාව පිළිබඳව ශ්රී ලංකා බලධාරීන්, රුසියානු බලධාරීන් සමඟ සාකච්ඡා කරමින් සිටින බවත් දෙරටේ මහ බැංකු අතරද මේ පිළිබඳව සාකච්ඡා පැවැත්වෙන බවත් බන්දුල ගුණවර් ධන මහතා ස්පුට්නික් පුවත් සේවය සමඟ පැවති සම්මුඛ සාකච්ඡාවේදී ප්‍රකාශ කර තිබේ.
රුසියාවට පනවා ඇති සම්බාධක හේතුවෙන් මාස්ටර් සහ වීසා කාඩ්පත් රුසියානු ජාතිකයින්ට භාවිත කළ නොහැකි නිසා රුසියානු ගෙවීම් පද්ධතියට සම්බන්ධ වූ විට ශ්රී ලංකාවට පැමිණෙන රුසියානු සංචාරකයින් හට රුසියානු ණය කාඩ්පත් සහ හර කාඩ්පත් භාවිත කිරීමට ඉඩ ලැබීම හේතුවෙන් ඔවුන්ට පහසුවක් වන බව ගුණවර්ධන මහතා එහිදී සඳහන් කර ඇත.මහ බැංකුවෙන් අනුමැතිය ලැබුණු පසු මේ බව නිවේදනය කරන බව ඔහු පෙන්වා දී තිබේ.
– lankadeepa
No comments:
Post a Comment