"අපි පාසල් යන කාලෙත් එජාපයේ නායකයා රනිල් "- රනිල් ගැන මනුෂ කිව්ව සැර කතාව මෙන්න

අපි පාසල් යන කාලෙත් එක්සත් ජාතික පක්ෂයේ නායකයා රනිල් වික්‍රමසිංහ මහත්තයා. හැබැයි අපි දන්නවා ලෝකය අලුත් වෙමින් තමයි හැමදාම ඉස්සරහට යන්නේ. ඒක නිසා එක්සත් ජාතික පක්ෂයත් ඉදිරියට යන්න නම් පක්ෂ නායකත්වයත් අනිවාර්යයෙන්ම වෙනස් වෙන්න ඕන.” මෙසේ අදහස් ප්‍රකාශකර සිටියේ ගාල්ල දිස්ත්‍රික් පාර්ලිමේන්තු මන්ත්‍රි මනුෂ නානායක්කාර ගාල්ල ප්‍රදේශයේදී මාධ්‍යයට විශේෂ ප්‍රකාශයක් කරමින්ය.

මන්ත්‍රිවරයා වැඩිදුරටත් මෙසේද කීය. “ජනාධිපතිවරණයේදී අපේක්ෂක සජිත් ප්‍රේමදාස මහත්තයා ජන්ද ලක්ෂ පනස් හතර දහසකට වඩා ලබාගෙන තියෙනවා. රටේ මිනිස්සු අපේ ජනාධිපති අපේක්ෂක සජිත් ප්‍රේමදාස මහත්තයගේ  වැඩපිළිවෙළ විශ්වාස කළා. එහෙනම් තවදුරටත් එක්සත් ජාතික පක්ෂයට පරණ නායකත්වය යටතේ තවදුරටත් යන්න බෑ. ඒක නිසා දැන් මේ මොහොතේ එක්සත් ජාතික පක්ෂයේ නායකත්වය පක්ෂයේ නව තරුණ නායකත්වයට භාරදෙන්න ඕන. එහෙම වුණොත් ඉදිරි පාර්ලිමේන්තු මැතිවරණයේදී ශක්තිමත් කණ්ඩායමක් විදියට අපට ඉදිරිපත් වෙන්න පුළුවන්.

එහෙම වුණොත් ඉදිරි අවුරුදු පහ තුළ පක්ෂයේ අඩුපාඩු හදාගෙන ජයග්‍රාහී ගමනක් යන්න පුළුවන්. දැනටමත් එක්සත් ජාතික පක්ෂයේ බහුතර මන්ත්‍රිවරු කථානායකතුමාට ලිපියක් භාරදීලා තියෙන්නේ විපක්ෂ නායක ධුරය සජිත් ප්‍රේමදාස මහත්තයට දෙන්න කියලා. අපේ මන්ත්‍රිවරු බහුතරයක් අස්සන් කරලා කථානායකතුමාට ලියුමක් භාරදීලා තියෙන්නේ. මේ වෙලාවේ එක්සත් ජාතික පක්ෂය නව නායකත්වයක් යටතේ ගමට ගිහින් පාක්ෂිකයන් රැකගෙන දේශපාලනය කරන්න ඕන. එහෙම නැතුව ආණ්ඩුවත් එක්ක ඩීල් දාන දේශපාලනයක් නෙවෙයි අපට ඕන.”

යක්කලමුල්ල - දමිත් සඳනුවන් කීර්ති