වඳ සැත්කම් සිදුකළ බවට චෝදනා එල්ල වී ඇති කුරුණෑගල ශික්‍ෂණ රෝහලේ ප‍්‍රසව හා නාරි වෛද්‍ය සෙයිගු ෂෙහාබ්ඞීන් මොහොමඞ් ෂාෆි මහතා සම්බන්ධව විමර්ශනය කිරීමට විද්වත් මණ්ඩලයක් පත් කරන බව සෞඛ්‍ය ඇමැති රාජිත සේනාරත්න මහතා පැවසීය.
ඒ සඳහා සුදුසුකම් ඇති ප‍්‍රසව හා නාරි වෛද්‍යවරුන් තිදෙනකු සහ වෛද්‍ය සභාවෙන් නියෝජිතයකු සමග සිවු පුද්ගල මණ්ඩලයක් පත්කර මෙම චෝදනා සම්බන්ධව සෞඛ්‍ය අමාත්‍යාංශය මට්ටමින් පුළුල් පරීක්‍ෂණයක් කරන බව ඊයේ අරලියගහ මන්දිරයේදී පැවති මාධ්‍ය හමුවකදී ඇමැතිවරයා සඳහන් කළේය.
එම පරීක්‍ෂණයෙන් වෛද්‍යවරයා වැරදිකරුවකු වුවහොත් රටේ නීතිය සහ සෞඛ්‍ය අමාත්‍යංශය නීතිය අනුව දැඩි තීරණයක් ගන්නා බවද හෙතෙම කියා සිටියේය. සිසේරියන් සැත්කමක් සිදු කරන අවස්ථාවේ ශල්‍ය වෛද්‍යවරයකු, සහකාර වෛද්‍යවරයකු, නිර්වින්දන වෛද්‍යවරයකු, හෙදියන්, උපස්ථායකයන්, කම්කරුවන් යන සියලූ දෙනාම ශල්‍යාගාරයක් තුළ සිටින බවත් ඔවුන් නොමැතිව තනිව වෛද්‍යවරයකුට එම සැත්කමක් සිදුකළ නොහැකි බවත් ඇමැතිවරයා පැවසීය.
එහෙත් මේ සම්බන්ධව ඇත්ත නැත්ත සෙවීමට පත්කරන විද්වත් මණ්ඩලයට ඉඩ ලබාදෙන බවද හෙතෙම වැඩිදුරටත් කියා සිටියේය.
No comments:
Post a Comment